mardi 19 mai 2009

femmes putes / Bitches

مُنْيَه







مِتْلَحْفَه بْسَفساري

و الفُم مْسَوِّكْ
الراس في العارْ.. يْداري
و اللُّوبان في اللْسان مْشَوِّكْ

مرا

تايهه في الدْواميس
لاهي مَلاكْ
وْ لاهي ابليس
تْضَِّوي ديما عَلْ بَرَّانِي
على جيلْ بَطَّالْ.. يعاني

اطيافْ لِيها مْهاجره

مِن كل صوابْ
الخريفْ حَلْ
و الارواح كافره
بِالنار من تحت السراول
اِتْطُلْ
اللي ريحتو شْرابْ
و اللي ريحتو .. فلْ

مرا من طين

وَلّا عْروسْ بْحَر
سْفِينَه مِنْ فِلِّينْ
تطفو عالعلقم و المُرْ

في عز شبابها

ضَرْبِتْها الْحيُوط
مُجِيرَه.. كْلاها كَوَّالْ
و فاتها الفوت
هايمه في خْيالْها
كْلامها وْجيعْتُو .. مَوَّالْ
لِينْ خَزْزِتْ أطرافها
و لَبْسِتْ ألْفْ.. كَبُّوطْ

بْيَاضْ شْعَرْها.. صُوفْ

ما عْرَفْ ليلها ..ڤَمرَه
كانْ لامْبِتْهَا الَحمْرَه
تِضْوي
في اعتم.. كْهُوف
الدَّخْله فيها بْعَشْرَه
و الخرجه منها
بْزُوز كْفُوفْ

هي مُنْيَه القحبه

بْدَنْ..رَحْبَه
في بالو عايِشْ
لِرجال ترعى كي هْوايِشْ
في ْلَحم ْ مَعْقُوفْ
جْبينْها سْمَا مْسَحْبَه
ورْمُوشْها .. حْرِيرْ مَنْتُوفْ

مُنْيَهْ

قَحْبِةْ كَارْتي
مْرَا.. نْسَاتْ رَبِّي
و رَبِّي نْسَاها
دَمدِمها، كَسَّرْها و ْعْمَاها
ْْو في نَهْج سيدي عبد الله
ْرْمَاها


يْقولو القحبه

لا دين و لا مِلَّه
اتذَكِّر يا مُنيه
اوِّلْ مَرَّه ليكْ في عبد الله
كانْ رَابع يُومْ صِِيف
الشَّمسْ تِشوي السَُّّره
و الشهيلي يْوَِّلع الكِيفْ


قالُولك .. هْنَا

تْسَكِّرْ عِينيكْ تْشِيشَه
و تْهِزْ ساقيكْ ريشَه
و باقي العِيشَه
نُصْ غْنا..
و نُصْ فْنَا..
لكنْ يا مُنْيَه
الدِّنْيا شْنِيَّه
و انتي في نُص الثْنِيَّه
لاكْ غَاديكَ و لاْك هْنا
لاْك مْرَا
و لاكْ صْبيَّه
عمرك ثلاثين
وْ شِيبِكْ يُغْمِزْ بِالِعِيْن
وْكايِلْ باب بْناتْ
لْحمِكْ..كلَات َ
و رْجَالِكْ يا تونس
ياما تْعدَّاوْ عليك .. سْنِيْن
اُدخِلْ لِلْكْهُوف
تْنام ليلك بْلَا ڤَمْره
وْلَا تْرى النْجُومِ.. بْخوفْ
يِزِّيكْ مِنْ وَقْفِة البيران
وِجْهكْ تِضْرَبْ
وْ جَد بوكْ.. تْسَبْ

انتي هْنَا..

قَحْبه رَسْمِي
تِملِكْ زُوزْ بِيبَانْ
الدوله امك
يا مْرا بلا ضْنَا

يا مُنيه

مْعاك في الكَهْفْ برشه نْسا
كُل وَحْدَه ِبْملَايَه تِتْغَطَّى
قْبَلْ ما يُدخل رَاجِل لِلزْنا

يا مُنيه

يا مْرَا مِنْ.. فْنَا
لا تاريخ ..لا اَصْلْ
و حتى اِسم بُوك تِنْسَى

واقْفَه فِي بابْ

العِينِين تاكلْ فِيها تْرَاب
الكرش كوره مالشرابْ
و بْزازِلْها مَسُّو السَّاقِين
الكبت ينبح كي الكلاب
رجال تكركر في الدُّمارْ
و تِتْمرِّغ في التراب
وْ كِيمَا ْيُموتْ الشْرَفْ
يْمُوتْ العارْ

و انتي يا مُنيه

اللي تْنَسِّي الهَْم و الدنيا
و تطفي الشمس و النار
على خَدّامْةْ الحْزامْ والمْرَمَّه
لِلِّي صْوابِعْهُم ِمالبَغْلِي طَابُو
و ما نْفَعْ طَلْيانْهُمْ بِالحِنَّه
للِّي سِنِّيهُمْ عابُو
سِنَّه.. سِنَّهْ

كي مولاة الدنيا

صاحت
مُنيه...تِسْتَنّى
"الدَّخْلْه بْعَشْره"

وْقِفْ واحِد في الباب

و في ظلام الكهف.. غابْ
بْصَابُونْ فايِحْ
غَسْلِتْ مُنيه الشْرَفْ الرَّايَحْ
و المسكين
يُخْزِرْ حزين
خَلّى في البْلادْ
مْرَا و..اوْلادْ
و هَاذي اوِّل مَرَّه يْجِربْ الزْنَا
هَزِت مُنيه سَاقيها
و المسكين مُوش هْنا
نَظْرْتُو سارحه
و حليلتو طايحه
رغم اِلّي ما رَاشْ انثى مِنْ سْنَه


آهْ يا حَسْرَه

قَدَّاشْكِ رْخِيصَهْ
يا دِنيا
دْفَعِلك عَشْرَه
و ما مََضَّى النَّابْ
ما خانِشْ العِشْرَهْ
و ماعْمَلْ كِالكْلَابْ
...
طَاحْ عْالتْرَابْ
يِبْكِي في الَاحْبَابْ


هبِّطْ ساقيك يا مُنيه

و قُوم للباب
و قول الي دَخَلْلِكْ
خْرَج قَدرو عالي و صْوَابْ

لا يْقُلو مُنيه

تِتْعابْ
و ترجع للوكايل
و عيشةْ العْذابْ


تِبزِق ْالبَطْرُونَه

في وِجْه مُنْيَه وْ اَمَالْ وميمونه
وْ تَلْعْنْ هَالبْلَاْد
بِكُلْ طَحَّانْ..وْ بِكُلْ مِيبُونَه
ِتْحلِفْ لُو كَان ماجَاتِش
شِيفُونَه
رَاهِي دَخْلِتْ مِيَاةْ رَاجل
في كْهُوفْها المحنُونه
يَضْحِك فُمْ مُنْيَه
وْ يِتْهَد القَلْبْ
تخَاف تَرْجَعْ لِلْوْكايِل
و الطْرايَحْ و الغُلْبْ
تِجري للْمرايه
و تْمسِح الدَّمْع السَّايِلْ
الاحَمِر عَ شْفَايِفْ
و الاخضر ع جْفُونْ
تْزِيدْ تْعَرِّي البْزَازِل
و تْكَحِّلْ لَعْيُونْ
الكْلَابْ تْهِيجْ
البَطْرُونه بِالبْخُورْ تْصُونْ
و لسانها بالرَّبْ..يْليجْ


مُنيه خَدَّامه

العَشْرَه وَلَّاوْ مْيَا
وْ كُل مَا ْتُموتْ على ظْهرهاَ
بِالسِّبتَه
ترَجْعَهَا البَطْرُونَه لِلْحْيَا

ما تبْكيشْ يا مُنْيه

الفرق ما بين الطْهارَه
و الطْفَارَه
حَرَْفْ
انتي اخْترْتْ الفَا
اخْتَرْت مُرْ اللُّقْمه
ع الجُوعْ و الحْفَا


ما تبْكيشْ يا مُنْيه

الدِنْيا كي التَكْتَاكه
يا منيه
الدِنْيا كي التَكْتَاكه
تَعْطِي لِلطَّحَّانَه
وْ تْخلِّي القْحَابْ.. هَكَّاكَه

قُومْ يا مُنيه وْ لِمْ الكَبُّوطْ

فاتك الفُوتْ
يا مْرا مِنْ صُوفْ
يا شُولِيقه بْكُلْهَا دَمْ
عَافِتْها الْخيُوطْ
و عْبَقْ مِنْ رِيحِتْهَا الُموتْ

يا مُنيه

يا مْرا
من ارْبعَه حْرُوفْ
يا آخِر قَحْبَه مِتْلَحْفَه
بْنِجمَه و هْلَال
احْلِمْ نْهَار.. تْطِير
بعيد عالدَّامُوسْ
بْرِيشْ طَاُووسْ
و جوانِحْ.. حْلالْ








مهدي هميلي


باريس



24 مارس 2010


اهداء الى كل فتاة ليل...و كل قحبه و كل امراه اكلت يوما من ثدييها لتعيش...


كل الحب و الالم



M


© مهدي هميلي

2 commentaires: